Hər şey qaranlıqdan başladı.
Boz kütlənin içində itib-batmış azadlığımızı xoşbəxtliyimizə qurban vermişdik.
Ətrafımızdakı məğlub olmuş insanlar bizim mübarizəmizə gülürdülər.
Biz də gülürdük onların acizliyinə.
Həyat MTV ekranlarından görünən kimi rəngarəng, insanlar diş pastası reklamlarındakı kimi xoşbəxt deyildi.
Hava zavod tüstülərinə, Od silahlara, Su qana dönmüşdü.
Torpaq isə mərmər parkların altında qalmışdı.
İnsanlar öz maskalarına çevrilmişdi.
Bütün vaxtımız boş keçirdi, amma heç nəyə də vaxtımız çatmırdı.
Gördüyümüz ədalətizlikləri içimizdə söyürdük.
Müasir gənclər inqubatorundan ölüm statistikasına doğru gedən bu yolda bizi pul, içki və seks gözləyirdi.
Amma biz cəsarət, xoşbəxtlik və sevgini seçdik.
Biz seçilmişliyi seçdik.
Paradoksları normaya, istisnaları qanuna çevirdik.
Dünyanı əksinə fırlatmaq üçün geriyə dönməyimiz bəsdir.